Fitti, – dai unwuise Käl -.
Eine wahre Geschichte,
gehört, bewahrt und erzählt von
Ferdi Kühle
Luie, niu mot iek ugge ois maol wat vertellen.
Vui harrn in Nuienbeächmen vor Jaohren ne unwuisen Käl,
Fitti, dat was ne Halodri.
Goett hevv iän seälig.
Fitti was von Biälke un imme gaazen Maihnedaale bekannt.
Wann Fitti iut diäm Hiuse Bathe suine schlikkerigen, gräotschniutigen Vertellekes loslöt oder süss Luie op de Schüppe niemed; dann bluiwed kain Äoge droige un dat gaaze Doerp har wuier wat te lachen.
Ointe weäk ugge niu vertellen.
Fittis Naower Rudi was in Saust imme Krankenhius. „— jao —“, dachte Fitti, „Moste duinen Naower äok maol besaiken, aower dao mak iek mui en Späsken riut.“
Hai packere suin Schlaoptuich un dai Pantiufeln in ne Taske un fuhr näo Saust int Marienkrankenhius, hui trokk hai siek op dr Toilette gau ümme.
— Un dann —; dai Visite was bius vörbui, dao kloppere Fitti an Rudis Kammerdöer:
„Herein“; un Fitti staond bui Rudi imme Nachtpulter vörme Berre. “Guten Morgen Rudi, biu goiert dui?“
Rudi was gaaz verschrokken, hai kannte jao Fitti als fidelen Naower, un niu imme Krankenhius?
„Was machst du denn hier?“ Wull Rudi dann wieten. „Oh Rudi, iek sin säo leäge, iek hevv et säo imme Balleg, mui goiert säo mikkerich, iek hevv ne gaaz boisen Verdacht un well niu wieten borümme et mui säo kuwwelig ies? Iek sin wahne wiepelich un was vandage all inner Kerke un hev bui dr Mäoer Guottes ne Kerze anstieken“, jankere Fitti daorümme.
Rudi kon dat nit begruipen dat siek suin Naower Fitti suike Soergen maken mot.
„Rudi, et wäd Tuit, dai Dokters wachtet all, laot dui guet gaohn.“ Un wiäg was dai Fitti. Äh Rudi dao no säo imme Berre lagg, dao hiät hai dai gaaze Tuit simuliert, wat suin Naower wuoll für Malessen hiät?
Am Numedag, Rudi harr suine Naune ächter siek, dao hiät hai siek säo dacht, „Jao niu well iek maol Fitti besaiken un hören wat dai Doktors bui iähme diagnostiert hiät? Ei, niu hevv iek vergiäten, Fitti no suiner Zimmernummer te fraogen, na jao, wat salls? Dann mot iek eäwen nomme Pförtner goahn.“
„Hallo, guten Tag ich hätte gern die Zimmernummer von meinem Nachbarn Friedhelm Bathe:“ Dai Käls anner Porte käuken dai Liste näo, aower oin Bathe was dao nit te finden. Säowat, dat kann doach nit suin.
Rudi was daomet aower nit tefrieren, hai vertallte diän Käls dat Fitti bui iähme was un hui imme Hiuse suin möchte.
Niu hiäste dao näomaol unentlik dai Listen nao kieken, aower oin Bathe was nit te finden!
Rudi was all gaaz verbiestert äh hai wuier op suine Kammer genk un siek wuier int Berre laggte.
Äh hai säo öwer Fitti simulierte raip suine Frugge Monika an:
„Rudi wie geht es dir, wann kann ich dich abholen?“
„Mir geht es gut, aber weißt du was von Fitti?“
Un Rudi vertallte suiner Frugge niu dai gaaze Geschichte, wat hai met Fitti vandage säo erleäwet hiät.
Monika satt te Hiuse vörme Fister un harr dat Hius met Fitti vuoll imme Blikke;
„Rudi, was erzählst du mir da, ich sehe den Fitti hier ganz fidel auf seiner Bank sitzen und dem schmeckt das Bier so gut, der kann nicht krank sein, hast du das geträumt, muss ich mir Sorgen machen?“
Niu genk Rudi en Lecht op, dat Fitti iähme dumm Tuich vertallt hiät un dat gaaze ne Iulenspaigelerigge van Fitti was.
Un Fitti, dai jao nix äh süeke Nücken imme Koppe hiät ,dai harr en Späsken dat iähme dat wuier glükke was un dat gaaze Duorp harr wuier wat te lachen.
